झापा — ग्रामीण क्षेत्रमा गुणस्तरीय स्वास्थ्य सेवा विस्तार गर्ने लक्ष्यसहित कमल गाउँपालिकाले स्वास्थ्य क्षेत्रमा उल्लेखनीय प्रगति गरेको छ। निर्माणाधीन लखनपुर स्वास्थ्य चौकी अब छिट्टै अत्याधुनिक सेवासहित सञ्चालनमा आउने तयारीमा रहेको छ, जसले स्थानीय स्वास्थ्य क्षेत्रमा ठूलो परिवर्तन ल्याउने अपेक्षा गरिएको छ।
गाउँपालिकाका अध्यक्ष हुकुम सिंह राईले हालै स्वास्थ्य चौकीको स्थलगत निरीक्षण गर्दै स्वास्थ्य पूर्वाधार सुदृढीकरणप्रति आफ्नो प्रतिबद्धता दोहोर्याउनुभएको छ। निरीक्षणमा प्रमुख प्रशासकीय अधिकृत केशव कुमार ढकाल, स्वास्थ्य शाखा प्रमुख दिपक प्रसाद दहाल, स्वास्थ्य चौकी प्रमुख बिषर्जन मोक्तान तथा इन्जिनियर मणि कुमार लिम्बू सहभागी थिए।
प्राविधिक टोलीका अनुसार स्वास्थ्य चौकी भवन निर्माण कार्य अन्तिम चरणमा पुगेको छ र केही बाँकी काम सम्पन्न भएसँगै छिट्टै हस्तान्तरण प्रक्रिया अघि बढाइनेछ। अध्यक्ष राईले निर्माणको गुणस्तरप्रति सन्तोष व्यक्त गर्दै समयमै काम सम्पन्न गर्न निर्माण व्यवसायीलाई निर्देशन दिनुभयो। उहाँले गुणस्तरीय र समयमै सम्पन्न गर्नु नै प्राथमिकता रहेको स्पष्ट पार्नुभयो।
लखनपुर स्वास्थ्य चौकी अब सामान्य उपचार केन्द्रमा मात्र सीमित रहने छैन। यहाँ मेडिकल अधिकृत (डाक्टर) सहितको सेवा, सुविधा सम्पन्न बर्थिङ्ग सेन्टर, मातृ तथा शिशु स्वास्थ्य सेवा तथा आकस्मिक प्राथमिक उपचार सञ्चालनमा ल्याउने तयारी भइरहेको छ। यसबाट विशेषगरी गर्भवती महिला, नवजात शिशु तथा जटिल बिरामीलाई गाउँमै सहज रूपमा सेवा उपलब्ध हुने अपेक्षा गरिएको छ।
स्वास्थ्य चौकी स्तरोन्नतिले कमल गाउँपालिका वडा नं. ५, ६ र ७ का हजारौँ नागरिकलाई प्रत्यक्ष लाभ पुग्नेछ। स्थानीयवासीका अनुसार अहिले सामान्य स्वास्थ्य समस्या हुँदा पनि दमक वा बिर्तामोड जानुपर्ने बाध्यता रहेको थियो, तर अब गाउँमै सेवा उपलब्ध भएपछि समय र खर्च दुवैमा बचत हुने तथा आपतकालीन अवस्थामा तुरुन्त उपचार पाउने अवस्था सिर्जना हुनेछ।
निरीक्षणका क्रममा अध्यक्ष राईले अब सानो उपचारका लागि सहर धाउनुपर्ने अवस्था अन्त्य हुने बताउँदै गाउँमै मेडिकल अधिकृतसहितको सेवा उपलब्ध गराउने लक्ष्य रहेको स्पष्ट पार्नुभयो। उहाँले स्वास्थ्य क्षेत्रलाई गाउँपालिकाको पहिलो प्राथमिकतामा राखिएको उल्लेख गर्दै आगामी दिनमा थप सेवा विस्तार गरिने जानकारी दिनुभयो।
अध्यक्ष राईले निर्माण व्यवसायीलाई बाँकी काम तोकिएको समयभित्र गुणस्तरीय रूपमा सम्पन्न गर्न निर्देशन दिनुभएको छ भने स्वास्थ्यकर्मीलाई जनमैत्री सेवा दिन आग्रह गर्नुभएको छ। उहाँले जनताले प्रत्यक्ष रूपमा परिवर्तनको अनुभूति गर्न सक्ने गरी सेवा दिनुपर्नेमा जोड दिनुभयो।
पछिल्लो समय कमल गाउँपालिकाले स्वास्थ्य क्षेत्रमा निरन्तर सुधार गर्दै आएको छ। स्वास्थ्य संस्था स्तरोन्नति, नियमित स्वास्थ्य शिविर, मातृ तथा शिशु स्वास्थ्य कार्यक्रम तथा खोप सेवाको सुदृढीकरणमार्फत स्थानीय स्तरमै स्वास्थ्य सेवाको पहुँच विस्तार भइरहेको छ।
स्थानीयवासीहरू स्वास्थ्य चौकी स्तरोन्नतिप्रति उत्साहित देखिएका छन्। उनीहरूका अनुसार अब गाउँमै अस्पतालजस्तो सेवा पाइने भएपछि सहर धाउनुपर्ने बाध्यता अन्त्य हुने विश्वास लिइएको छ।
लखनपुर स्वास्थ्य चौकीको स्तरोन्नति केवल पूर्वाधार विकास मात्र नभई ग्रामीण स्वास्थ्य सेवामा नयाँ चरणको सुरुवातको रूपमा लिइएको छ। यसले स्वास्थ्य सेवाको पहुँच, गुणस्तर र विश्वसनीयतामा सुधार ल्याउँदै स्थानीय नागरिकको जीवनस्तर उकास्न महत्वपूर्ण भूमिका खेल्ने अपेक्षा गरिएको छ।
