दमक । रास्वपा सांसद भूमिका श्रेष्ठले संसद्को शून्य समयमा तेस्रोलिंगी समुदायको स्थापित पहिचानसँग सम्बन्धित विषयमा दिएको अभिव्यक्तिप्रति लैंगिक तथा यौनिक अल्पसङ्ख्यक समुदायले गम्भीर ध्यानाकर्षण जनाएको छ।
लिड नेपाल दमककि प्रमुख नुमा लिम्बू साउदेनले वर्षौँको संघर्षबाट स्थापित भएको लैंगिक पहिचानलाई व्यक्तिको व्यक्तिगत अभिव्यक्तिका आधारमा अन्य शब्दावलीतर्फ मोड्ने प्रयास हुन नहुने बताउनुभएको छ।
उहाँका अनुसार सर्वोच्च अदालतको निर्देशनात्मक आदेश तथा नेपालको संविधानले लैंगिक तथा यौनिक अल्पसङ्ख्यक समुदायको पहिचान र अधिकारलाई स्थापित गरेको अवस्थामा राज्यका कानुन तथा सार्वजनिक संस्थामा प्रयोग हुने शब्दावली परिवर्तन गर्ने विषय व्यक्तिगत अभिव्यक्तिबाट मात्र निर्धारण हुन सक्दैन।
साउदेनले ‘तेस्रोलिंगी’ पहिचानमा आफूलाई चिनाउँदै आएका तथा ‘अन्य’ लैंगिक पहिचानमा नागरिकता लिएका समुदायका सदस्यको स्थापित पहिचानलाई सम्मान गर्नुपर्ने बताउनुभयो। सांसद श्रेष्ठले विगतमा प्रयोग गर्दै आएको पहिचान र अहिले प्रयोग गर्नुभएको ‘पारलिंगी’ शब्दको आधारबारे स्पष्ट पार्नुपर्ने उहाँको भनाइ छ।
“हामी कुनै व्यक्तिको व्यक्तिगत पहिचान वा अभिव्यक्ति माथि प्रश्न उठाउन खोजेका होइनौँ। तर संसदमा प्रयोग भएको शब्दले समुदायको स्थापित पहिचान, संवैधानिक अधिकार र कानुनी व्यवस्थामा अन्योल सिर्जना गर्ने अवस्था आउनु हुँदैन,” साउदेनले भन्नुभयो।
उहाँले संविधान, कानुन र सर्वोच्च अदालतको आदेशबाट स्थापित अधिकार तथा समुदायले आत्मपहिचानका रूपमा प्रयोग गर्दै आएको शब्दावलीको सम्मान गर्न माग गर्नुभएको छ। साथै, संविधान र प्रचलित कानुनमा मान्यता नपाएको ‘पारलिंगी’ शब्द संसद्को आधिकारिक अभिलेखमा प्रयोग भएको भए आवश्यक छानबिन गरी त्यसबारे स्पष्टता कायम गर्न सभामुखसमक्ष आग्रह गर्नुभएको छ।
साउदेनले लैंगिक पहिचानसँग सम्बन्धित विषयमा राज्य र समुदायबीच अन्योल सिर्जना हुने अवस्था आउन नदिन सम्बन्धित निकायले स्पष्ट धारणा सार्वजनिक गर्नुपर्ने बताउनुभयो।
सम्बन्धित खवर
