बनेपा–१०, काभ्रे। नाइटिङ्गेल एकेडेमीमा आजदेखि परियोजना आधारित सिकाइ (Project-Based Learning – PBL) प्रदर्शनी सुरु भएको छ। प्रदर्शनीको पहिलो दिन कक्षा ८ र ९ का विद्यार्थीहरूले तयार पारेका विभिन्न शैक्षिक परियोजनाहरू प्रस्तुत गरेका छन्।
कार्यक्रममा अभिभावकहरूको समेत उल्लेख्य सहभागिता रहेको थियो।विद्यालयका प्रधानाध्यापकले पीबीएल पद्धतिले विद्यार्थीमा सृजनशीलता, समालोचनात्मक सोच, सहकार्य भावना र आत्मविश्वास विकास गर्ने बताए।
उनका अनुसार कक्षाकोठामा सिकेको ज्ञानलाई व्यवहारमा उतार्ने प्रभावकारी माध्यमका रूपमा पीबीएललाई लिइएको छ।प्रदर्शनीमा विज्ञान, वातावरण संरक्षण, प्रविधि, सामाजिक विषय, नवप्रवर्तन तथा जीवनोपयोगी सीपसँग सम्बन्धित परियोजनाहरू समावेश गरिएका छन्। विद्यार्थीहरूले आफ्ना परियोजनाबारे अभिभावक तथा आगन्तुकहरूसँग प्रत्यक्ष संवाद गर्दै प्रस्तुति दिएका थिए।
कार्यक्रम अवलोकन गरेका अभिभावकहरूले विद्यार्थीहरूको प्रस्तुतीकरण शैली र आत्मविश्वासप्रति खुसी व्यक्त गरेका छन् भने शिक्षकहरूले उनीहरूको मेहनत, अनुसन्धान क्षमता र टोलीकार्यको प्रशंसा गरेका छन्।
विद्यालय प्रशासनका अनुसार पीबीएल प्रदर्शनी केही दिनसम्म कक्षा–कक्षागत रूपमा निरन्तर सञ्चालन हुनेछ, जहाँ प्रत्येक दिन फरक–फरक कक्षाका विद्यार्थीहरूले आफ्ना परियोजनाहरू प्रस्तुत गर्नेछन्।
यस किसिमका गतिविधिबाट विद्यार्थीहरूमा व्यवहारिक ज्ञान, नेतृत्व क्षमता तथा समस्या समाधान गर्ने सीप विकास हुने विश्वास विद्यालयले लिएको छ।
