कमल, झापा । कोशी प्रदेशको पहिलो “कोशी घुम्ती अस्पताल” को औपचारिक उद्घाटन कोशी प्रदेशका मुख्यमन्त्री हिक्मत कुमार कार्कीले कमल नगर अस्पतालमा गर्नुभएको छ।
झापाको कमल गाउँपालिकाबाट कोशी प्रदेशकै पहिलो घुम्ती अस्पताल सेवा सुरु हुनु ऐतिहासिक उपलब्धि भएको बताउँदै मुख्यमन्त्री कार्कीले स्वास्थ्य सेवाको पहुँचबाट टाढा रहेका ग्रामीण तथा अर्ध–शहरी समुदायलाई लक्षित गरी यो कार्यक्रम सञ्चालनमा ल्याइएको जानकारी दिनुभयो।
गाउँ–गाउँमा सहज रूपमा स्वास्थ्य सेवा पुर्याउने उद्देश्यले सञ्चालनमा ल्याइएको घुम्ती अस्पतालबाट नागरिकले विशेषज्ञ चिकित्सकमार्फत गुणस्तरीय सेवा सहजै प्राप्त गर्ने स्वास्थ्य मन्त्री मानबहादुर लिम्बुले बताउनुभयो। उहाँले यस्ता जनहितका कार्यक्रमलाई पार्टीगत दृष्टिकोणले नभई सबैले साझा रूपमा साथ र सहयोग गर्नुपर्नेमा जोड दिनुभयो।
कोशी प्रदेश सरकारद्वारा सञ्चालनमा ल्याइएको पहिलो घुम्ती अस्पताल आफ्नै पालिकाबाट सुरु भएकोमा खुसी व्यक्त गर्दै कमल गाउँपालिकाका अध्यक्ष हुकुम सिंह राईले प्रदेश सरकारप्रति धन्यवाद व्यक्त गर्नुभयो। घुम्ती अस्पतालमार्फत आफ्ना पालिकाका नागरिकले विशेषज्ञ चिकित्सकबाट निःशुल्क सेवा पाउन थालेको उल्लेख गर्दै उहाँले यसले स्थानीय स्वास्थ्य सेवामा ठुलो राहत पुगेको बताउनुभयो।
घुम्ती अस्पताल सेवाअन्तर्गत रगत परीक्षण, पिसाब परीक्षण, रक्तचाप जाँच, मधुमेह (सुगर) परीक्षण, थाइराइड जाँच, मुटु सम्बन्धी परीक्षण, ईसीजी (मुटुको जाँच), हड्डी तथा नसासम्बन्धी रोगको परीक्षण, विशेषज्ञ परामर्श तथा आवश्यक औषधि निःशुल्क वितरण गरिएको थियो।
कार्यक्रममा स्वास्थ्य निर्देशनालय कोशीका निर्देशक ज्ञानबहादुर बस्नेत, जिल्ला समन्वय समिति झापाका प्रमुख विश्वनाथ बराल, झापाका प्रमुख जिल्ला अधिकारी शिवराम गेलाल, कोशी प्रदेश स्वास्थ्य मन्त्रालयका सचिव यदुचन्द्र घिमिरे, विशेषज्ञ चिकित्सक, जनप्रतिनिधि तथा स्थानीय नागरिकहरूको उल्लेख्य उपस्थिति रहेको थियो।
AI–आधारित Digital X-Ray सहितको स्वास्थ्य शिविर पनि सञ्चालन
त्यसैगरी कमल नगर अस्पतालमा Artificial Intelligence (AI) प्रविधिमा आधारित Digital X-Ray सेवा सहितको स्वास्थ्य शिविर पनि सञ्चालन गरिएको थियो। शिविरमार्फत क्षयरोग, फोक्सो तथा छातीसम्बन्धी रोगहरूको छिटो र प्रभावकारी परीक्षण गरिएको थियो।
कमल नगर अस्पताल प्रमुख दिपक प्रसाद दहालका अनुसार, AI–Digital X-Ray सेवामार्फत जम्मा १८२ जनाको परीक्षण गरिएकोमा ३६ जना क्षयरोग शंकास्पद देखिएकाले थप परीक्षण तथा उपचारका लागि सिफारिस गरिएको छ। समग्रमा घुम्ती अस्पताल र AI–Digital X-Ray शिविरबाट जम्मा ३६१ जनाले विभिन्न स्वास्थ्य सेवा लिएका थिए।
यस प्रकारका एकीकृत तथा प्रविधिमैत्री स्वास्थ्य कार्यक्रमले ग्रामीण समुदायको स्वास्थ्यस्तर सुधारमा दीर्घकालीन योगदान पुर्याउने अपेक्षा गरिएको छ।
