झापा, असोज ९ । कमल गाउँपालिका अध्यक्ष हुकुम सिंह राईको पहलमा इलाका प्रहरी कार्यालय दमकलाई सवारी साधन हस्तान्तरण गरिएको छ ।

गाउँपालिकाले शान्ति सुरक्षा सुदृढीकरणका लागि आवश्यक ठानेर उपलब्ध गराएको सो पिकअप भ्यानको चाबी प्रमुख प्रशासकीय अधिकृत केशव कुमार ढकाल र समाजसेवी लायन भिम पौडेलले संयुक्त रूपमा इलाका प्रहरी कार्यालय दमकका प्रमुख डिएसपी राम प्रसाद तिम्सिनालाई हस्तान्तरण गर्नुभएको छ ।

यस अवसरमा डिएसपी तिम्सिनाले प्रहरी सेवामा सहजता ल्याउन गाउँपालिकाले गरेको योगदान ऐतिहासिक रहेको बताउनुभयो । सोही क्रममा अध्यक्ष हुकुम सिंह राईले गाउँपालिकाले सुरक्षा व्यवस्थालाई प्राथमिकतामा राख्दै आगामी दिनमा पनि यस्ता सहयोग गर्ने प्रतिबद्धता जनाउनुभयो ।

स्थानीयबासीहरूले अध्यक्ष राईको पहलमा गरिएको यो योगदानले शान्ति सुरक्षा प्रवर्द्धनमा महत्वपूर्ण टेवा पुर्‍याउने विश्वास व्यक्त गरेका छन् ।