झापा — गाउँमै आधुनिक स्वास्थ्य सेवा उपलब्ध गराउने अभियानअन्तर्गत आज कमल नगर अस्पतालमा नियमित दन्त सेवा तथा खोप सेवा सफलतापूर्वक सम्पन्न गरिएको छ।
स्वास्थ्य क्षेत्रलाई नजिकबाट अनुभूति गर्ने, नागरिकमैत्री सेवा निरन्तरता दिने र जनताको विश्वास जित्ने उद्देश्यका साथ अस्पतालले दुवै सेवा प्रभावकारी रूपमा अघि बढाएको हो।
प्रत्येक आइतबार र बिहीबार सञ्चालन हुने दन्त सेवा यसपटक पनि डा. हेमराज गैरे, डा. सायरा ढकाल तथा दमक हस्पिटल एण्ड रिसर्च सेन्टर, दमकको प्राविधिक टोलीको सहकार्यमा प्रदान गरिएको थियो। दमक हस्पिटल एण्ड रिसर्च सेन्टर स्वास्थ्य बीमा कार्यक्रमसहित लामो समयदेखि दमकमा सञ्चालनमा रहेको प्रतिष्ठित स्वास्थ्य संस्था हो।
अस्पतालमा दाँत दुख्ने, मुख–गिजा सम्बन्धी समस्या, दाँत निकाल्ने लगायतका उपचारका लागि बिरामीहरूको आगमन लगातार बढ्दै गएको छ।
अस्पतालका मेडिकल सुपरिन्टेन्डेन्ट डा. फुलकका अनुसार, “सेवाको सुरुवातसँगै बिरामीहरूको संख्या उल्लेखनीय रूपमा वृद्धि भएको छ र सेवाग्राहीहरू अत्यन्त सन्तुष्ट छन्।”
दमक हस्पिटलका दन्त विशेषज्ञ डा. हेमराज गैरेले गाउँमै गुणस्तरीय उपचार सेवा दिन पाएकोमा खुशी व्यक्त गर्दै भने, “शहरमा जस्तै उपचार अब गाउँमै सम्भव भएको छ। यो स्थानीय सरकारको ठूलो उपलब्धि हो।”
यसैबीच, कार्तिक महिनाको नियमित खोप सेवा कार्यक्रम पनि आजै कमल नगर अस्पताल केन्द्रमा उत्साहपूर्वक सम्पन्न गरिएको छ।
बालबालिका र गर्भवती महिलाका लागि आवश्यक खोप वितरण गरिएको उक्त कार्यक्रममा अभिभावकहरूको सक्रिय सहभागिता देखिएको थियो।
वडा नं. २ का अध्यक्ष अशोक सुब्बाका अनुसार, “निरन्तर खोप सेवाका कारण बालबालिकामा रोग प्रतिरोधात्मक क्षमता वृद्धि भएको छ र मातृ स्वास्थ्यमा समेत सकारात्मक सुधार देखिएको छ।”
कमल गाउँपालिका अध्यक्ष हुकुम सिंह राईको नेतृत्वमा गाउँपालिकाभर स्वास्थ्य सेवा सुदृढ पार्ने अभियान तीव्र रूपमा अघि बढिरहेको छ।
उनको पहलमा गाउँकै अस्पतालमा स्वास्थ्य बीमा कार्यक्रम, डेन्टल चेयर, ल्याब उपकरण, डाक्टर, नर्सिङ सेवा र अन्य आधुनिक स्वास्थ्य सुविधा विस्तार भइरहेको छ।
जनप्रतिनिधिको यस्ता पहलले गाउँका जनतालाई स्वास्थ्य सेवामा सहज पहुँच दिलाएको छ।
स्थानीय बासिन्दाको सहभागिता र समर्थन पनि अस्पतालका हरेक गतिविधिमा निरन्तर बढ्दै गएको छ।
सेवाग्राहीहरूले पनि खुशी व्यक्त गर्दै भनेका छन् — “अब दाँतको उपचार वा खोपका लागि टाढा जानु पर्दैन। हाम्रै गाउँमा यस्तो राम्रो सेवा पाउँदा गर्व लाग्छ।”
कमल नगर अस्पतालले “गाउँमै विशेषज्ञ सेवा, गाउँकै विश्वास” भन्ने नारालाई व्यवहारमा उतार्दै आएको छ।
निरन्तर भइरहेका दन्त सेवा, खोप कार्यक्रम र अन्य स्वास्थ्य अभियानहरूले गाउँपालिकाको स्वास्थ्य क्षेत्रमा नयाँ उचाइ स्थापित गरेको छ।
अध्यक्ष हुकुम सिंह राईको दूरदृष्टि, अस्पताल व्यवस्थापनको सक्रियता र स्वास्थ्यकर्मीहरूको निष्ठाले आज कमल नगर अस्पताल गाउँका जनताको गर्व बन्न पुगेको छ।
